ښاغلى محمد معصوم ستانکزی د محمود خان ستانکزی زوی دی ١٣٣٧ه کال کی لوګر ولايت محمداغې ولسوالۍ، زماګلخيلو/ماګخيلو (مغل خيلو) کلي کې زېږدلاى، لومړنۍ زده کړې يې د مغلو خيلو په ښوونځي او د محمد اغی په ليسه کي بشپړې کړي. لوړې زده کړې يې د کابل مخابراتو انستتيوت د مايکروويو څانګه کې کړي، د ليسانس دوره يې د مخابري په برخه کې په حربي پوهنتون کې سر ته رسولې. مديريت او اداري علومو کې له پيرستون پوهنتون څخه ماسټري لري، دويمه ماسټري يې (د اوږده پرمختګ او رغونې فلسفه) کې د برتانيا له کامبريج پوهنتون څخه ترلاسه کړې. . همدا راز ستانکزى په ٢٠٠٨ زېږديز کال کې د امريکا متحده ايالانو د سولې انستيتوت سره څېړنيزه دنده ترسره کړي چې ددې څېړنې تمرکز په افغانستان کې امنيت، بيا رغونې او روغې جوړې وو . ستانکزي د افغانستان ډيموکراټيک جمهوريت او د افغانستان اسلامي جمهوريت په دورو کې دولتي او غير دولتي دندې ترسره کړي. د افغانستان ډيموکراټيک جمهوريت په دوره کې د حربي پوهنتون فراغت وروسته د افغانستان له ملي پوځ سره يو ځاى شو او تر ١٣٧٤ه کال پورې يې د هېواد بېلابېلو برخوکې د افغانستان د ملي دفاع وزارت د تشکيلاتو او اوپراسيون رياستونو په چوکاټ کې د غونډ قومندان او د فرقې د مرستيال په توګه دنده ترسره کړي دي. په ١٣٧٤ه کال کې په داسې حال کې چې د قرغې فرقې مرستيال قومندان او د ډګروالۍ نطامي رتبې خاوند وه د رژيم بدلېدو له امله پوځ پرېښودو ته اړ شو. دا چې ستانکزى په سياسي ډول د خلق که پرچم ګوند يا کوم بل سياسي ګوند سره تړاو لري مالومات نشته خو د پرچم ډلې پورې تړاو درلودل يې شوني دي. د ستانکزى پلار د مجاهيدنو لخواپه دې تور شهيد شو چې زوى يې د وخت له کمونيست رژيم سره تړاو درلود. د افغانستان اسلامي جمهوريت دوره کې نوموړي له ٢٠٠٠ - ٢٠٠٢ز پورې د افغانستان بيا رغونې او انرژۍ موسسې (اريا) کې دنده درلوده، له ٢٠٠٢ز څخه تر ٢٠٠٤ ز د مخابراتو او مالوماتي تکنالوژى وزير، له ٢٠٠٤- ٢٠٠٦ ز د ولسمشر سلاکار وزير او د وسلو ټولو (ډي ډي آز) بهير مشر، له ٢٠٠٦- ٢٠١٠ز کال پورې د ولسمشر امنيتي سلاکار او د ملکي کولو او بيارغونې د بهير (ډاياک) مشر، له ٢٠١٠- ٢٠١٥ ز کال د ولسمشر د کورنيو چارو امنيتي سلاکار او د سولې عالي شورا د دارالانشا مشر، له ٢٠١٥-٢٠١٦ ز کال د ملي وحدت حکومت کې د ملي دفاع وزارت ځايناستى او د سولې په چاروکې د ولسمشر ځانګړي استازي په توګه دندې ترسره کړي دي. سربېره پر پوځي چارو ستانکزى د مخابراتو، بشري مرستو، ټولنېزې پراختيا، دولت جوړونې او مديريت په برخه کې ٢٥ کالنه کاري تجربه لري. نوموړى د ٢٠١٦ زېږديز کال د مې مياشتې په پنځمه نېټه د ولسمشر محمد اشرف غني لخوا د ملي امنيت ځايناستي په توګه وګمارل شو، او د ٢٠١٩ ز کال په ترڅ کې له يادې دندې ګوښه شو. اوس د افغانستان د اسلامي جمهوريت د سولې مرکچي پلاوي مشر دى. ستانکزى دروند او کرار سياستوال دى چې له هرې سياسي او حکومتي تګلارې سره په اسانۍ همغاړى کېداى شي، د ستانکزي کرار چلند او په ځانګړي دريځ ټينګار نه درلودل، د ډاکټر نجيب الله د حکومت تجربه به په دوحه کې د سولې بهير کې ستره مرسته وکړي. يادونه: د لېوال ښې حکومتولى پروګرام، پتيلې چې د دوحې د سولې تاريخي بهير وڅاري. د افغانستان د اسلامي جمهوريت او د افغانستان د اسلامي امارت مرکچي پلاوو غړو پېژندلو کې ولس سره مرسته وکړي او د هغوى کړه وړه تاريخ ته وسپاري. د تاريخ زدکړيلانو ته بلنه ورکوو چې زموږ سره ملتيا وکړي . همدرانګه هڅه روانه ده چې دريمګړي ولسي لوري رامنځته کولو کې هم خپله ملي، ديني او ولسي دنده ترسره کړي. له ټولو هېوادوالو، مرکچي پلاويو له غړو، دريمګړو او د بهير له مينوالو څخه هيله کوو چې موږ سره خپل مالومات شري کړئ او د پورتنيو مالوماتوپه سمون کې مرسته وکړي.